Gauzak ez joakoz ondo Jesusi. Zeozer somatzen dau; bere ezbaiak ditu, eta ikasleei jalgitzen deutse galderea, ezer argituko badau.

Jentearen ustea jakin gura dau. Eta ez daukela argi jasoten dau erantzun lez: eretzi ezbardinak daukez. Ikasleek eurek ere ez dauke argi, antza; danen izenean erantzuten dau Pedrok.

Baina emoten dauan erantzuna inondik inora ere ez dau onartuko Jesusek: bera ez da jenteak uste eta itxaroten dauan Mesias. Jesusek ez dau horrela ikusten bere burua.

Eurekaz bizi dan artean, ikasleek ez dabe ikusiko Jesusengan gizon bat baino. Apartekoa, behar bada; baina gizon bat, besterik ez. Eta euren usteezko irudi bat eraikitzen jardungo dabe.

Badakie eurek uste daben Mesias ez dana. Eta Jesusen erantzunak atzeraka eragingo deutse. Zer behar ete dabe Jesus ezagutzeko?

Gerora jakingo dogu geuk ere, Jesusen aldentzeak bideratuko dauala pazko-esperientzia sakona, eta halan ezagutuko dabela benetako Jesus.

Hortixik iragarriko dabe, horixe ikusi dabelako Jesusengan, emoten dan bizitzak sortuazoten dauala bizitza betea. Eta horixe iragarriko dabe.